Plattdeutsche Nachrichten Plattdüütsche Narichten vun'n 07. Mai 2024
Standdatum: 7. Mai 2024.
Informationen zum Audio
- Verfügbar bis: 7. Mai 2025 Informationen zur Verweildauer
Israel grippt Ziele in den süüdlichen Gaza-Striepen an
Rafah: Dat israelsche Militär hett Deele vun de Stadt in den süüdlichen Gaza-Striepen angrepen. Vörher hett dat israelsche Kriegskabinett beslaten, dat de Militäroperatschoon gegen de Hamas in dat Rebeet wieder löppt. De Grenzövergang in de Nögde twuschen den Gaza-Striepen un Agypten steiht ünner Füer, maken en Reeg Medien künnig. Eerst hebbt de Hamas tostimmt dat de Wapen rohen schüllt, man de israelsche Regerung hett aver, vunwegen de Bedingen, utslaan.
Binnenminister snackt achterna Attack op Politiker
Potsdam: Hüüt Avend wüllt de Binnenminister vun Bund un Länner per Videokunferenz doröver snacken, wo Minschen, de sik för Politik insetten, beter vör Gewalt schützt warrn köönt. Dat Land Sachen will in den Bunnsraat tofaatkriegen, dat Angreep op Politiker un Hölpslüüd bi Wahlen orrig bestraaft warrn. Dor achter stickt de Attack op den SPD-Toppkandidat Matthias Ecke verleden Freedag.
CDU maakt wieder mit Bunnsparteidag
Berlin: De CDU maakt hüüt wieder mit ehren Bunnsparteidag. De Delegeerten wüllt, na 17 Johren, över dat nee Grundsatzprogramm snacken un achteran besluten. De CDU will sik, na eegen Wöör, vun den Inholt her nee opstellen. To´n Bispill geiht dat in dat nee Programm, üm en Bekenntnis to de düütsche Richtkultur un dat Asylrecht, wat strenger warrn schall. Al güstern hebbt de Delegeerten ehren Parteibaas Friedrich Merz mit binah 90 Perzent vun de Stimmen wedderwählt.
Telekom maakt Sluss mit de Telefonutkunft
Bonn: De Düütsche Telekom stellt ehren telefonschen Utkunftsdeenst Enn twee-dusend-veer-un-twintig in, maakt dat Ünnernehmen künnig, vunwegen jümmer weniger Minschen dat bruken. Dorto höört ok de Binnenlandsutkunft or de Opwaakdeenst. In den negentiger Johren hebbt mehrere hunnert Millioon per Johr dor anropen, middelwiel sünd dat weniger as twee Millioon, see de Telekom.
Emilia un Mohamed weren 2023 de meist bruukten Naam för Neeboren
Bremen: Emilia un Mohamed weren verleden Johr de meist bruukten Naam för Neeboren in Bremen. Dorachter kemen bi de Deerns Sophia un Lina, un bi de Jungs Noah un Mateo. Dat hett de „Sellschop för düütsche Spraak“ künnig maakt.
Dat Weer
Un nu kiekt wi op dat Weer: In Bremen, Emm un Möppen hebbt wi överall 12 Graad, in Bremerhoben sünd dat opstunns 13 Graad. Hüüt Vörmiddag hangt de Heven vull Wulken, de Sünn schafft dat meist nich aver dat is tominns dröög. An Namiddag un Avend warrn de Wulken weniger un de Sünn lacht af un an. Dorbi kann dat aver ok mal lütte Schuers geven, an Avend is dat meist dröög. Dat Thermometer wiest us 14 bet 16 Graad op de Eilannen un an de Küst, 18 bet 19 Graad in´t Binnenland. In de Nacht mal mehr mal weniger Wulken, eerst noch enkelte Schuer, laater blifft dat dröög. An Morgen kann dat en beten daakig ween un dat bi 10 Graad op de Eilannen un 9 bet 4 Graad in´t Binnenland. Middeweken fangt mit lachen Sünnenschien un en poor lütte Wulken an.Twuschen Werser un Ems sünd een Reeg dicke Wulken ünnerwegens, man de smiet aver blots kort mal Natts vun baven, meist is dat aver dröög un ok dor schafft de Sünn dat jümmer beter an de Wulken vörbi. Un dat denn bi 17 bet 20 Graad in´t Binnenland un 14 bet 16 Graad an de Küst.
Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.