Plattdeutsche Nachrichten Plattdüütsche Narichten vun'n 10. Mai 2024

Pistorius levert tosättlich Wapen in de Ukraine

Washington – Verdeffenderenminister Boris Pistorius hett sien US-Kollegen mehr militärische Hölp tosekert. Buterdem hett he ankünnigt, dat Dütschland de Ukraine dree Raketensmieter-Systeme levert. De Wapen stammt ut Bestännen vun‘t amerikansche Militär un ward vun Dütschland betahlt. Dat System langt 75 Kilometer wiet un is in de Ukraine all in’n Insatt.  

Israel will Rafah ok ahn US-Hölp angriepen

Tel Aviv – Israel will sien Angriepen in’n Gaza-Striepen to Noot ok ahn Hölp vun de USA fortsetten. Israels Ministerpräsident Netanjahu hett verklaart, dat sien Land ok alleen gegen de Hamas in’n Gazastriepen kämpfen ward. Vördem harr US-Präsident Biden draut, dat Levern vun Wapen an Israel een Grenz to setten, wenn dat Militär Rafah in’n Süden vun’n Gazastriepen angriept.

Bremer Senat rekent mit hogen Utgaven för Scholen

Bremen – De Senat rekent för de tokamen Johre mit hogen Utgaven för dat op Schick bringen un nee boen vun Scholen un Kinnergaarn in de Stadt Bremen. Dat steiht in een Antwurt vun’n Senat op een grode Anfraag vun de FDP. De Senat meent darna woll, dat hannelt sik üm bold 2 Milliarden Euro. De Hälft geiht in dat wedder trechtmaken vun Scholen un Kitas, de annere Hälft in den Neeboo.

Bremen will in’n Harvst över mööglich Habenanlegger för CO2 entscheden

Bremen – De Senat will in’n Harvst över den mööglich Boo vun een Habenanlegger för CO2 entscheden. Dat vermellt de Staatsraat ut de Wertschupp, Stührenberg, op Anfraag vun de Dütsche Press-Agentur. Över den Anlegger köönt Scheep in’n Neestädter Haben CO2 opnehmen un to Spiekers in de Nordsee bringen, to’n Bispill na Norwegen. Dütschland mutt dat daan wegen dat, wat se för den Klimaschutz henkregen mööt.

Twee Duppelhüüs in Westerstäe fangt Füer

Westerstäe – In de Stadt in’n Kreis Ammerland hebbt an’n Morrn twee Duppelhüüs Füer fungen, de dör Carports verbunnen weern. Versehrt worrn is nümms. Een Auto weer woll ünner dat Carport in Brand kamen, söß Füerwehrn weern in’n Insatt.

Dat Weer

Un nu een Blick op dat Weer: op Wangerooge 12, in Bremerhaben 13, un in Bremen un Deefholt sünd dat opstunns 17 Graad. Vundaag wesselt sik Sünnschien un Wulken af, dat blifft dröög bi 17 bit 21 Graad. An de Nordsee bi 14 bit 16 Graad. Tokamen Nacht ward dat blots to’n Deel wulkig or klaar, in’n Süden vun Bremen kann later Nevel opkamen. Vun de Nordsee her kummt dicke Wulken op, de bit to’n Morrn ok in’n Süden ankamen sünd. Mit Regen is man nich to reken, dat Thermometer sackt op 11 bit 7 Graad. Morrn treckt de dicken Wulken ut de Nacht na Süden weg. Darachter wesselt sik Sünnschien un Wulken af, de sik aver bit to’n Abend wieter oplööst un darachter schient alleen de Sünn bi 18 bit 22 Graad, an de See bi 15 bit 17 Graad. Dat weern de Narichten op Platt. Gabriele Intemann hett se tohoopstellt. Op platt trechtmaakt un vörleest hett se Heidi Jürgens.